काठमाण्डौः मेलम्ची खानेपानी आयोजना छाडेको निर्माण कम्पनी सी.एम.सी.बाट भुक्तानी नपाएका स्थानीय मजदुरहरू हप्ता दिनदेखी आन्दोलनरत रहेका छन् ।
उनीहरूले सहायक निर्माण कम्पनी र सप्लायर्सले बाँकी रकम नपाउँदासम्म मेलम्ची आयोजनाको बाँकी काम गर्न नदिने भन्दै भदौ १८ गतेदेखि आन्दोलनमा उत्रिएका हुन् । सोही बिषयलाइ प्रमुख एजेण्डा बनाइ पीडित मजदुरहरुले मंगलबार पनि मेलम्ची स्थित खानेपानीको गेट अगाडि प्रदर्शन र नाराबाजी जारी राखेका छन् ।
मेलम्ची आयोजना पीडित संघर्ष समितीका अध्यक्ष देवीरमण अधिकारिको नेतृत्वमा बुधबारदेखी जारी आन्दोलनमा प्रमुख प्रतिपक्ष काँग्रेस, ट्रेड युनियन महासंघ, राप्रपाले समेत ऐक्यबद्धता जनाएका छन् ।
दैनिक रूपमा हुने उक्त प्रदर्शनमा करिब २ सय भन्दा बढी मजदुरहरू सहभागी छन् । सी.एम.सी.को भुक्तानी रकम नपाएका करिब ८ सय २८ मजदुरहरू रहेपनि दैनिक आन्दोलनमा २ सयको मात्रै उपस्थिति हुने गरेको छ ।
आन्दोलनकारीहरूले मेलम्ची बसपार्क स्थित मेलम्ची गेस्ट हाउसबाट सदाझै जुलुश प्रदर्शन गरी मेलम्ची खानेपानी अफिसको गेटमा पुगेर दैनिक जसो धर्नामा बस्छन् । यद्दपी स्थानिय प्रशासनले आन्दोलनलाई भड्किन नदिन भदौ २० गतेदेखी दैनिक रूपमा बिहान १० बजेदेखी साँझ ५ बजेसम्म (हेलम्बु गा.पा.का २ नम्बर वडाको अम्माथान र ग्यालथुङ्ग) तथा सुरूङबाट ५ सय मिटर उक्त ईलाका आसपासमा निषेधाज्ञा जारी गरेको जनाएको छ ।
मजदुरले पाउनुपर्ने ८ करोड ७४ लाख रकम मध्य नेपाल सरकारले सिएस्मसी कम्पनीबाट करिब ४ अर्ब जफत गरेको र सोही रकमबाट भुक्तानी गरियोस भनी ९ महिनासम्म २७ पटकसम्म विभिन्न चरणमा बार्ता गर्दा पनि पीडित मजदुरहरुको समस्यालाइ बेवास्ता गरेको मजदुरहरूले आरोप लगाएका छन् ।
