काठमाण्डौः काठमाण्डौको तारकेश्वर न.पा. वडा नम्बर ४ गोलढुङ्गा स्थित नर्थ भ्यू रेष्टुरेन्ट बाहिर प्रहरीले गोली चलाई साजन गुरुङलाई नियन्त्रणमा लिएको छ । प्रहरीको मोस्ट वान्टेड सूचीमा रहेका नजोक भन्ने साजन गुरुङलाई महानगरीय प्रहरी अपराध महासाखाबाट खटिएका प्रहरीनायव उपरिक्षक दुर्गा दाहाल नेतृत्वको बिशेष टोलिले करिब १६:५० बजे नियन्त्रणमा लिएको हो ।
निज गुरूङ प्रहरीलाइ देखी भाग्न खोजेको र प्रहरीले नियन्त्रणमा लिन २ राउन्ड गोलि चलाउदा गुरुङको तिघ्रा र घुँडामा गोलि लागेको छ । समिरमान बस्नेतका सहयोगी रहेका घाइते साजन गुरुङलाई उपचारको लागी अपराध महासाखाको टोलिले ट्रमा सेन्टर महांकाल लगेको छ । धादिङका ३३ वर्षीय साजन कर्तव्य ज्यान मुद्धामा-३ वर्ष जेल बसेर गत वर्षको असारमा छुटेका ब्यक्ति हुन् । गुरूङ्गले निर्माण व्यवसायीसँग रकम असुल्ने गरेको प्रहरी दावी रहेको छ ।
