काठमाण्डाैंः नेपाल ओलम्पिक कमिटी (NOC) को अध्यक्षमा प्रतिस्पर्धी उमेशलाल श्रेष्ठलाई ७ मत अन्तरले हराँउदै जीवनराम श्रेष्ठ निर्वाचित भएका छन् । दोस्रो कार्यकालको लागी अध्यक्षमा उठेका जीवनरामले १७ मत पाएका थिए भने उमेशलाल श्रेष्ठले १० मत पाएका थिए । यसैगरी महासचिव लगायतका अन्य पोष्टहरूमा जीवनराम समुह निर्वाचित भएको छ ।
बिजयी हुनेहरूमा महासचिवमा निलेन्द्रराज श्रेष्ठ, ५ सदस्यीय उपाध्यक्षहरूमा ज्योती राणा, चतुरानन्द राजवैद्य, तेजबहादुर गुरुङ, सुनिलकुमार श्रेष्ठ र अशोकरत्न बज्राचार्य रहेका छन् । त्यसैगरी उपमहासचिवमा पिताम्बर तिम्सिना, कोषाध्यक्षमा रतनकुमार टण्डन, ३ सदस्यीय सचिवमा दीपकहर्ष बज्राचार्य, तुलसी थापा, रामजीबहादुर श्रेष्ठ, केशब कुमार श्रेष्ठ निर्वाचित भएका छन् । ७ सदस्यीय सदस्यहरूमा बिजयी हुनेहरूमा रमेशप्रसाद शिवाकोटी, प्रकाशशम्सेर राणा, गोपालसुन्दर लाल कक्षपति, दीर्घबहादुर केसी, होमबहादुर दोङ, टासी घले, राम अवाले रहेका छन् ।
यसअघि नेपाल ओलम्पिक कमिटीको कार्यसमितिको निर्वाचनको मतदान कार्यक्रम भदौ २० गते तोकिएको थियो । निर्वाचन स्थगित गर्न माग गर्दै दायर गरेको रिटमा सर्वोच्चले भदौ १७ गते अन्तरिम आदेश दिँदै निर्वाचन नगर्न आदेश गरेको थियो। सर्वोच्च अदालतले बाटो खोलिदिएपछि भदौ २८ मा निर्वाचन मिति तोकिएको थियो । कमिटीको नयाँ नेतृत्वका लागि जीवनराम श्रेष्ठ र उमेशलाल श्रेष्ठ मैदान उत्रिएका थिए । निर्वाचनको पर्यवेक्षण अन्तर्राष्ट्रिय ओलम्पिक कमिटी र ओलम्पिक काउन्सिल अफ एशियाका प्रतिनिधिले गरेका थिए ।
