काठमाण्डौः विश्वको सर्वोच्च फिल्म अवार्ड अस्कर (द एकेडेमी अफ मोशन पिक्चर आर्टस् एण्ड साइन्सेस)ले ९७ औँ एकेडेमी अवार्डस् (द अस्कर अवार्ड) मा विदेशी भाषी चलचित्र विधामा नेपाली फिल्मका लागि आवेदन खुला गरिएको छ ।
सन् २०२५ मार्च २ आइतबारका दिन आयोजना हुने अस्करका लागि नेपाल फिल्म पठाउन अहिले आवेदन खुलाइएको हो । अवार्डको प्रतियोगितामा नेपाली फिल्मलाई सहभागी गराउन ‘विदेशी भाषी चलचित्र छनोट समिति (नेपाल)’ लाई एकेडेमीद्वारा तोकिएका सबै मापदण्ड पुग्ने एउटा उत्कृष्ट फिल्म छनोट गरी उक्त प्रतियोगितामा प्रतिस्पर्धी फिल्मका रूपमा सिफारिस गरी जानकारी गराउन द एकेडेमी अफ मोशन पिक्चर आर्टस् एण्ड साइन्सेसबाट अनुरोध पत्र प्राप्त भएको छ । सोही अनुसार ९७औँ अस्कर अवार्ड प्रतियोगितामा सामेल हुन चाहने सबै नेपाली फिल्म निर्देशक तथा निर्माताहरूलाई समिति आवेदन मागेको हो ।
९७ औँ एकेडेमी अवार्डको प्रतिस्पर्धामा भाग लिन नोभेम्बर १, २०२३ (२०८० कार्तिक १५) देखि सेप्टेम्बर ३०, २०२४ (२०८१ असोज १४) सम्म सार्वजनिक प्रदर्शन गरिएका फिल्महरू योग्य हुनेछन् । त्यसका लागि २०२४ सेप्टेम्बर १२ तारिख अर्थात् मिति २०८१ भदौ २७ गते दिनको ५ बजेभित्र समितिको सचिवालयमा दर्ता गराउनुपर्ने प्रावधान राखिएको छ ।
