काठमाण्डौ: नेपालीहरूको महान चाड बडादशैं आजबाट शुरु भएको छ । आश्विन शुक्ल प्रतिपदादेखि कोज्रागत पूर्णिमासम्म मनाइने यो पर्व आइतबारदेखि शुरु भएको हो ।
यो पर्व आश्विन शुक्ल पूर्णिमासम्म १५ दिन हर्षोल्लास र धूमधामका साथ मनाइन्छ । हिन्दु धर्मालम्बीहरूको महान चाडको पहिलो दिन आज रातो माटोले लिपेर चोखो र शुद्ध पारिएको स्थानमा दियो, कलश र गणेश स्थापना गरी चिसो बालुवामा जौ छरेर जमरा राखी घटस्थापना गरिँदै छ । घटस्थापनाको साईत विहान १०:३५ मा शुभ रहेको छ ।
आजैदेखि दशैँ घरमा शक्तिकी अधिष्ठात्री देवी दुर्गाको आह्वान गरी पूजा आरम्भ हुन्छ । जौको अङ्कुर दुर्गा देवीको प्रिय वस्तु भएकाले दुर्गालाई चढाएर विजया दशमीको दिन टीका प्रसादसहित समृद्धिको प्रतीक पहेँलो जमरा ग्रहण गरिन्छ । दशैँ पर्वलाई असत्यमाथि सत्य र आसुरी शक्तिमाथि दैवी शक्तिको विजयको प्रतीकका रूपमा मनाउने गरिन्छ ।
