काठमाण्डौः टर्कीका राष्ट्रपतिले अमेरिकी राष्ट्रपतिको पत्रलाई रद्दीको टोकरीमा फालेको अन्तराष्ट्रिय सञ्चारमाध्यामहरूले जनाएका छन् ।
अमेरिकी राष्ट्रपति डोनाल्ड ट्रम्पले टर्कीका आफ्ना समकक्षीलाई उत्तरी सिरियामा कुर्दिश नेतृत्वको फौज विरुद्ध कार्बाही नगर्न आग्रह गरेपनी टर्कीका राष्ट्रपति रेजेप तय्यीप एर्दोआनले ट्रम्पको भनाइ नमानेका थिए ।
अक्टोबर ९ मा सिरियाबाट अमेरिकी फौज फिर्ता भएपछि अमेरिकी रास्ट्रपति ट्रम्पले एर्दोआनलाई धेरै कठोर र मूर्ख नबन्न समेत भनेका थिए ।
अमेरिकाले सिरियाबाट आफ्नो फौज फिर्ता बोलाएपछि अहिले व्यापक आलोचना खेपिरहेको छ। अमेरिकाको त्यस्तो कदमले टर्कीलाई सैन्य कारबाही गर्न बाटो खुला गरेको तर्क देखिन्छ ।
टर्कीका राष्ट्रपति एर्दोआनलाई ट्रम्पले भनेका छन्, “एउटा राम्रो सम्झौताका निम्ति काम गरौँ। हजारौँ मानिसलाई बलि चढाइएको कुराका लागि तपाईँ जिम्मेवार हुन चाहनुहुन्न र टर्कीको अर्थतन्त्र ध्वस्त पार्नका लागि म जिम्मेवार हुन चाहन्नँ “पत्रमा उल्लेख छ ।
त्यस्तै जवाफमा टर्कीका राष्ट्रपति निकट स्रोतका अनुसार राष्ट्रपति एर्दोआनले पत्र प्राप्त गरेपछि त्यस पत्रलाई सिधै अस्वीकार गरि काम नलाग्ने गरी रद्धीको टोकरीमा फालेको बिबिसीले उल्लेख गरेको छ ।
