काठमाण्डौः प्रधानमन्त्री केपी शर्मा ओलीको स्वास्थ्य अवस्था सामान्य रहेको छ ।
नियमित स्वास्थ्य चेकजाँचका लागि काठमाण्डौको धापासीमा रहेको ग्राण्डी इन्टरनेशनल अस्पतालको आईसियुको बेड नं १४१६ मा भर्ना भएका प्रधानमन्त्री ओलीको स्वास्थ्य अवस्था सामान्य रहेको उपचारमा संलग्न चिकित्सकहरुले बताएका छन् ।
प्रधानमन्त्री ओलीकी निजी चिकित्सक तथा ग्रान्डी अस्पतालको नेफ्रोलोजी तथा ट्रान्सप्लान्ट मेडिसिन विभागकी अध्यक्ष प्रा.डा. दिव्यासिंह शाह र अस्पतालका मेडिकल डाइरेक्टर डा. चक्रराज पाण्डेद्वारा संयुक्त जारी प्रेस विज्ञप्तिमा प्रधानमन्त्री ओलीको स्वास्थ्य अवस्था सामान्य भएको बताइएको छ ।
उपप्रधान एवं रक्षामन्त्री ईश्वर पोखरेलले उपचारको क्रममा रहेका प्रधानमन्त्रीलाई बुधबार मात्रै दुईपटक भेटी स्वास्थ्य अवस्थाबारे जानकारी लिएका छन् । यसैगरी शिक्षामन्त्री गिरिराजमणि पोखरेल, सत्तारूढ नेकपा महासचिव बिष्णु पौडेल, श्रममन्त्री गोकर्ण बिष्ट, प्रमुख राजनितिक सल्लाहकार बिष्णु रिमाल लगायतका नेताहरुले अस्पतालमा पुगेर स्वास्थ्य अवस्थाका बारेमा बुझिरहेको स्रोत बताउँछ ।
अस्पताल स्रोतका अनुसार प्रधानमन्त्री ओलीको स्वासप्रश्वासमा समस्या देखिएको र पिसाव नहुने भएपछि आकस्मिक रुपमा भर्ना गरि पहिलो चरणको मृगौला डायलसिस गरिएको र यो क्रम तीन दिनसम्म गर्नु पर्ने बताइएको छ । उनका अनुसार भोलि बिहिबार पुनः दोस्रो चरणको डायलसिस गर्ने र पर्सी शुक्रबार तेस्रो डायलसिस गरेपछि मात्रै पहिलो चरणको डायलसिसको मात्रा सम्पन्न हुने बताइएको छ ।
त्यस्तै प्रधानमन्त्रीको थप उपचारका लागि फेरि सिंगापुर लैजाने की भन्ने विषयमा पनि चिकित्सकहरूबिच छलफल भैरहको गोप्य सुत्र बताँउछ । स्रोतका अुसार प्रधानमन्त्री शुक्रबारसम्म अस्पताल मै बसेर उपचार गराउने अबस्था देखिन्छ ।
बुधबार बिहान स्वास्थ्यमा समस्या देखिएपछी प्रधानमन्त्री ओलीको आईसियुमा भर्ना गरिएको थियो । प्रधानमन्त्री ओलीको १२ वर्ष अगाडि २०६४ सालमा भारतको अपोलो अस्पतालमा मिर्गौला प्रत्यारोपण गरिएको थियो ।
