काठमाण्डौः निवर्तमान सभामुख कृष्णबहादुर महरासँग जिल्ला अदालत काठमाण्डौले थुनछेक बहस शुरू गरेको छ ।
सरकारी वकिल कार्यालयले जबरजस्ती करणी उद्योगमा गत बिहीबार जिल्ला अदालतमा दर्ता गरेको मुद्धामा महरालाई बिहान सवा ११ बजे अदालतमा उपस्थित गराएर थुनछेक बहस शुरू गरेको हो ।
आईतबारको थुनछेक बहसमा महराको पक्षबाट पूर्व महान्यायाधिवक्ता तथा वरिष्ठ अधिवक्ता रमनकुमार श्रेष्ठ, नेपाल बार एसोसिएसनका पूर्व अध्यक्ष तथा वरिष्ठ अधिवक्ता शेरबहादुर केसी, वरिष्ठ अधिवक्ताहरू लभ मैनाली, कृष्णप्रसाद सापकोटा र सविता भण्डारी बराल, मुरारी सापकोटा र चन्द्र गुरागाँईंले बहस गरिरहेका छन् ।
जिल्ला अदालत काठमाडौंका न्यायाधीश सुदर्शन राज पाण्डेको इजलासमा उनको थुनछेक बहस सुरू भएको प्रवक्ता ज्ञानेन्द्र कार्कीले जानकारी दिए ।
अदालतको बन्द इजलासमा शुक्रबार भएको बयानमा महराले आफूमाथि लागेको आरोप अस्वीकार गर्दै पीडित भनिएकी महिलालाई सम्झाउन गए पनि फोन नउठेपछि कोठामा नगई फर्किएको र आफूले सभामुखको मर्यादा कायम राखेको बताएका थिए ।
प्रहरीले २० दिनसम्म गरेको अनुसन्धानपछि सरकारी वकिल कार्यालयले निवर्तमान सभामुख कृष्णबहादुर महराविरूद्ध संसद सचिवालयकी कर्मचारी रोशनी शाहीलाई बलात्कार प्रयास गरेको अभियोगमा जिल्ला अदालतमा बिहिवार मुद्दा दर्ता गरेको थियो ।
काठमाण्डौ जिल्ला अदालतमा गएको शुक्रबार बयान सकिए पनि हिजो शनिबार परेकाले थुनछेक बहस नसकिएकोले महरालाई पुर्पक्षका लागि थुनामै राखेर मुद्दा अघि बढाउनेकी धरौटी वा साधारण तारेखमा छोड्ने फैसला अदालतले गर्नेछ ।
महरामाथि संसद सचिवालयकी महिला कर्मचारीमाथि बलात्कार प्रयासको आरोप लागेपछि प्रहरीले गत असोज १९ गते सभामुखको सरकारी निवाशबाट पक्राउ गरेको थियो ।
