काठमाण्डौः नेकपा एमालेलाई चोइट्याएर अलग पार्टी गठन गर्दादेखि नै एकीकृत समाजवादीका अध्यक्ष माधव नेपाललाई आडभरोस भने माओवादी केन्द्रका अध्यक्ष पुष्पकमल दाहालले दिँदै आएका थिए ।
तर, अहिले स्थानीय निर्वाचनको मुखैमा आउँदा एकीकृत समाजवादीका अध्यक्ष नेपालसँग माओवादीका अध्यक्ष दाहाल बाउँठिन थालेको संकेत देखिन थालेको छ । तह र पदको बाँडफाँडका लागि सत्तारुढ गठबन्धनका शीर्ष नेताहरुका बिचमा विवाद र छलफल निष्कर्षतिर पुगिरहँदा गत साता माओवादी केन्द्रका अध्यक्ष पुष्पकमल दाहालले सार्वजनिक रुपमा एकीकृत समाजवादीका अध्यक्ष माधव नेपालले हैसियतभन्दा बढी माग गरेको भागवण्डामा समस्या आएको टिप्पणी गरेका थिए । एकीकृत समाजवादीका अध्यक्ष नेपाललाई लक्षित गरेर यस्तो टिप्पणी गरेका माओवादी अध्यक्ष दाहाल प्रतिमा नै नरोकिएर एकीकृत समाजवादीका अध्यक्ष नेपाललाई लक्षित गर्दै होलाइनवादी र राजावादीका विचमा गठबन्धनको पड्यन्त्र हुन थालेको अर्को टिप्पणी गरेका थिए ।
स्थानीय निर्वाचन सधारमा नै आइपुग्दा र पाँच दलको गठबन्धन मिलेर चुनावी मैदानमा जाने निश्चित भइरहंदा माओबादी केन्द्रका अध्यक्ष दाहालले एकीकृत समाजवादीका अध्यक्ष नेपाललाई लक्षित गर्दै गरेको यो टिप्पणीलाई अर्थपूर्ण रुपमा लिइएको छ । अध्यक्ष दाहालको आफतिर लक्षित गरेर व्यक्त गरिएको यो टिप्पणीको जबाफमा एकीकृत समाजवादीका अध्यक्ष नेपालले महानगरपालिका र उपमहानगरपालिकाको पदाधिकारी बांडफांडमा सम्मानजनक बाटो अपनाइएको भएपनि अन्य तहको बांडफांडका सम्बन्धमा भने नेपाली कांग्रेस र माओबादी केन्द्रका शीर्ष नेताहरुले आफ्नो पार्टीलाई सहभागी नगराएर अपमान गरेको तथा गठबन्धनको भावना विपरीत काम गर्न थालेको आरोप लगाएका छन् ।
स्थानीय तहको पदाधिकारीका बांडफांडतिर सबैको ध्यान केन्द्रित भइराखेको अवस्थामा र गठबन्धनका शीर्ष नेताहरु पनि महानगरपालिका, उपमहानगरपालिका तथा नगरपालिका र गाउँपालिकाको पदाधिकारी चयनको मामिलामा व्यस्त भइरहंदा गठबन्धनका दुई शीर्ष नेता पुष्पकमल दाहाल र माधव नेपालका बिचमा भएको यो दोहोरीलाई बेमौसमको बाजाको रुपमा भन्दा पनि राजनीतिक दृष्टिले अर्थपूर्ण रुपमा हेरिएको छ। गठबन्धनका दुई शीर्ष नेता दाहाल र नेपालका बिचमा यो दोहोरीको परिणाम स्थानीय निर्वाचनको परिणामपछि देखिनसक्ने टिप्पणीसमेत राजनीतिक क्षेत्रले गर्न थालेको छ । साँधु साप्ताहिक