काठमाण्डौः गत शुक्रवारदेखि प्रदर्शनमा आएको फिल्म हो ‘रङ्गेली’ ।
सफलताका साथ प्रदर्शनरत फिल्मको नयाँ गीत ‘फूल ओइलिएर’ सार्वजनिक भएको छ । निर्माण युनिटले फिल्म रिलिज भएको एकसाता पछि गीत युट्युबमा रिलिज गरेको हो ।
सुशान्त गौतमको स्वर तथा सङ्गीत रहेको गीतमा फिल्मका निर्देशक अर्जुन सुवेदीकै शब्द छ । गीतमा अभिनेता दयाहाङ र अभिनेत्री मिरुना देखिएका छन् । फिल्मले पनि प्रदर्शन समयदेखि नै दर्शकको राम्रो साथ पाइरहेको निर्माण युनिटको दाबी छ । दर्शकबाट फिल्म लामो समयको प्रतिक्रियापछि २१ मिनेट घटाइएको फिल्मको विदेशमा समेत माग हुँदै आएको बताइन्छ ।
अभिनेता दयाहाङ राईलाई एकै प्रकारका चरित्रमा देखिरहेको समयमा यो फिल्ममा फरक भूमिकामा देखिएका छन् । फिल्ममा अभिनेता आर्यन सिग्देलको समेत अभिनय छ । नेपाल रिलिजपछि फिल्म अमेरिका, क्यानडा, जापान, कोरिया, मलेसिया, दुबई, कतार, बहराइन, साउदी र ओमनमा रिलिज हुने पक्का भएको छ । अस्ट्रेलिया, युरोप, हङकङ, भारत लगायतका देशहरूमा रिलिजको लागि त्यहाँस्थित वितरकहरूसँग कुराकानी भइरेहको निर्देशक सुवेदीले बताए ।
फिल्ममा दयाहाङ राई र मिरुना मगरको अलावा अर्पण थापा, प्रवीण खतिवडा, रमेश बुढाथोकी, रुपेश झा, सुन्दर धिताल लगायतको अभिनय छ । फिल्मको कार्यकारी निर्माता जीतेन्द्र खतिवडा र अनुज जङ्ग थापा हुन् ।