काठमाण्डौः वीरगञ्ज ब्लास्टर र लुम्बिनी लायन्स भैरहवा चौथो संस्करणको नेपाल मारबाडी क्रिकेट लिगको सेमिफाइनलमा प्रवेश गरेका छन् । यी दुई टिम समूह ‘बी’बाट शीर्षस्थानमा रहँदै सेमिफाइनलमा पुगेका हुन् ।
समूह ‘बी’अन्तर्गत शनिबार भएको अन्तिम खेलमा वीरगञ्जले जनकपुरमाथि एक सय १३ रनको सानदार जित निकाल्दै सेमिफाइनल पुग्दा लुम्बिनीलाई भने नेपालगञ्ज वारियर्सले वाकओभर दिँदा सेमिफाइनल सहज भएको हो ।
भैरहवास्थित सिद्धार्थ रङ्गशालामा भएको अन्तिम खेलमा टस जितेर ब्याटिङ गरेको वीरगञ्जले निर्धारित २० ओभरको खेलमा पाँच विकेटको क्षतिमा एक सय ७० रनको बलियो योगफल बनायो । त्यसका लागि अभय रु¬ङ्गटाले ४४, रौनक केएलले अविजित ४२, गौरव अग्रवालले २० तथा सुमित कडमिया र राजन केएलले १४–१४ रनको योगदान गरे । बलिङमा जनकपुर रोयल्सका रवि अग्रवाल, आशिष सराफ, प्रविण अग्रवाल र राहुल नहरले समान १–१ विकेट लिए ।
एक सय ७० रनको उच्च योगफल पछ्याएको जनकपुर १२ ओभर ५ बलमा सबै विकेट गुमाउँदै ५७ रनमै समेटियो । उसका लागि आशिष सराफले १८ र प्रवीण अग्रवालले १७ रन बनाए पनि अन्य ब्याटरले दोहोरो अङ्कमा रन बटुल्न नसक्दा सो टिम फराकिलो अन्तरले पराजित भयो ।
जनकपुरलाई सस्तैमा रोक्न बलिङमा वीरगञ्जका विनित लोहियाले तीन दशमलव पाँच ओभरमा १८ रन खर्चेर सात विकेट हात पारे । यस्तै, अभय रुङ्गटाले दुई विकेट लिए । खेलमा विनित लोहिया प्लेयर अफ द म्याच भए ।
नेपाल राष्ट्रिय मारबडी युवा सङ्ठगन केन्द्रीय समितिको आयोजनामा भइरहेको प्रतियोगिताको सेमिफाइनल र फाइनल खेल भने मूलपानी क्रिकेटमैदान काठमाडौँमा हुने आयोजक संस्थाका केन्द्रीय अध्यक्ष मनोजकुमार अग्रवालले जानकारी दिनुभयो ।
